एजेन्सी । साउदी क्लब अल नासेर एसियाली क्लब फुटबलको शीर्ष प्रतियोगिता एएफसी च्याम्पियन्स लिगबाट बाहिरिएको छ ।
सोमवार राति भएको क्वाटरफाइनलअन्तर्गत दोस्रो लेग खेलमा युनाइटेड अरब इमिरेट्स (युएई) क्लब अल एनसंग ट्राइब्रेकरमा ३–१ ले पराजित हुँदै अल नासेर प्रतियोगिताबाट बाहिरिएको हो ।
अल नासेरको घरेलु मैदान अल अवाल पार्क एट किंग साउद युनिभर्सिटी रंगशालामा भएको खेल घरेलु टोलीले ४–३ ले जित्दा समग्रमा ४–४ को बराबरीमा टुंगिदा खेलको निर्णय ट्राइब्रेकरबाट लिइयो ।
पेनाल्टी सुटआउटमा युएई टोलीका लागि सौफियान राहिमी, अलेक्जान्ड्रो रोमेरो र सुल्टान अल शाम्सीले गोल गरे ।
यता, घरेलु टोलीका लागि भने कप्तान क्रिस्चियानो रोनाल्डोले मात्र पेनाल्टीमा गोल गर्न सके ।
मार्को ब्रोजोभिक र एलेक्स टेलेक्सको प्रहार गोलमा परिणत हुन सकेन ।
त्यसअघि खेलको २८ औं मिनेटमा अलेक्जान्ड्रो रोमेरोको पासमा सौफियान राहिमीले गोल गर्दै भ्रमणकारी टोलीलाई सुरुवाती दिलाउँदा समग्रमा २–० ले अघि बढ्यो ।
त्यस्तै, ४५ औं मिनेटमा माटियास पालासियोसको पासमा राहिमीले व्यक्तिगत रुपमा दोस्रो गोल थप्दा अल एन २–० समग्रमा ३–० ले अघि बढ्यो ।
तर, पहिलो हाफको इन्जुरी समयको पाँचौं मिनेटमा घरेलु टोलीका साडियो मानेको पासमा अब्दुलरहमान घरिबले गोल फर्काउँदा खेल २–१ समग्रमा ३–१ को अवस्थामा आयो ।
यता, दोस्रो हाफको ५१ औं मिनेटमा युएई क्लबका खालिद इसाले आत्मघाती गोल गर्न पुग्दा अल नासेर २–२ समग्रमा ३–२ को अवस्थामा आयो ।
त्यसपछि ७२ औं मिनेटमा एलेक्स टेलेक्सले गोल गर्दा अल नासेर ३–२ समग्रमा ३–३ को बराबरीमा आयो ।
निर्धारित ९० मिनेटमा निर्णय नभएपछि खेल अतिरिक्त ३० मिनेट लम्बियो ।
अतिरिक्त समयको १०३ औं मिनेटमा भ्रमणकारी टोलीका सुल्टान अल शम्सीले गोल गर्दा युएई क्लब ३–३ समग्रमा ४–३ ले अघि बढ्यो ।
तर, ११८ औं मिनेटमा रोनाल्डोले अल नासेरका लागि पेनाल्टीमा गोल गर्दा खेल ४–३ समग्रमा ४–४ मा सकियो ।
च्याम्पियन्स लिगअन्तर्गत पहिलो लेग खेलमा अल एन १–० ले विजयी भएको थियो ।
लेखक
