भक्तपुर । नेपालले संयुक्त राज्य अमेरिकाविरुद्वको टि–२० आई सिरिज क्लिन स्विप गरेको छ ।
सोमवार विहान भएको तेस्रो तथा अन्तिम खेलमा संयुक्त राज्य अमेरिकालाई ८ विकेटले पराजित गर्दै नेपालले सिरिज क्लिन स्विप गरेको हो ।
तीन खेलको सिरिजमा नेपालले यसअघि पहिलो खेल १७ रनले जित्दा दोस्रो खेल सुपरओभरमा जितेको थियो ।
अमेरिकाको टेक्सासस्थित ग्रान्ड प्रेरी क्रिकेट रंगशालामा भएको खेलमा १५७ रनको विजयी लक्ष्यका साथ जवाफी ब्याटिङमा उत्रिएको नेपाले १८.४ ओभरमा २ विकेट गुमाउँदै पूरा गर्यो ।
नेपाललाई जिताउन ओपनर ब्याट्सम्यान तथा विकेटकिपर आसिफ शेखले ३९ बलमा ५ चौका र २ छक्का प्रहार गर्दै ५० रनको अर्धशतक बनाउँदा कुलश मल्लले ३० बल खेल्नेक्रममा ४ चौका र १ छक्का प्रहार गर्दै ४४ रन जोडेर अविजित रहे ।
त्यस्तै, कुशल भुर्तेलले ३२ बलमा २ चौका र १ छक्का प्रहार गर्दै ४० रन जोडेर अविजित रहँदा अर्का ओपनर अनिल साहले ११ बल खेल्दै २ चौका प्रहार गरेर १३ रन जोड्दै पेविलियन फर्किए ।
नेपालले अतिरिक्त रुपमा १० रन जोड्यो ।
अमेरिकाका लागि जेसे सिंह र जुआनोय ड्राइस्डेलले १–१ विकेट लिए ।
त्यसअघि टस जितेर पहिला ब्याटिङमा उत्रिएको अमेरिकाले निर्धारित २० ओभरको खेलमा ५ विकेट गुमाएर १५६ रन जोड्यो ।
अमेरिकाका लागि ओपनर ब्याट्सम्यान सैतेजा मुक्कामल्लले ५१ बलमा ५ चौका र २ छक्का प्रहार गर्दै ६८ रनको अर्धशतकिय पारी खेल्दा मिलिन्द कुमारले ३५ बल खेल्नेक्रममा ४ चौका प्रहार गर्दै ४३ रन जोडेर अविजित रहिन् ।
त्यस्तै, आरोन जोन्सले १६ बलमा १ चौका प्रहार गर्दै १३ रन जोडेर आउट हुँदा हरमित सिंहले ३ बल खेल्दै १ छक्का प्रहार गरेर १० रन जोड्दै अविजित रहँदा शयान जाहानगिर ९ तथा कप्तान मोयङ्क पटेल र विकेटकिपर एन्ड्रेस गौस समान २–२ रनमा पेविलियन फर्किए ।
अमेरिकाले अतिरिक्त रुपमा ९ रन जोड्यो ।
नेपालका लागि सोमपाल कामीले ४ ओभर बलिङ गर्दै २७ रन खर्चिएर ३ विकेट लिँदा रिजन ढकाल र ललित राजबंशीले १–१ विकेट लिए ।
लेखक
