भक्तपुर । फिफा विश्वकपको दोस्रो चरण सनिवार अर्थात आजबाट सुरु हुँदैछ । १६ राष्ट्रहरुको टुंगो लागेसंगै नकआउट प्रणालीका आधारमा खेलिने खेल आजबाट सुरु हुन लागेको हो ।
प्रि–क्वाटरफाइनलका रुपमा पनि चिनिने अन्तिम १६ का दुई खेल आज राति हुनेछन् । पहिलो खेल नेपाली समयअनुसार राति पौने ९ बजे खालिफा अन्तराष्ट्रिय रंगशालामा नेडरल्याण्ड र संयुक्त राज्य अमेरिकावीच हुनेछ ।
त्यस्तै, दोस्रो खेलमा उपाधि दाबेदार राष्ट्र अर्जेन्टिना र एसियाली राष्ट्र अस्ट्रेलियाबीच राति पौने १ बजे अहम्मद बीन अली रंगशालामा प्रतिस्पर्धा हुनेछ ।
नेडरल्याण्डविरुद्व संयुक्त राज्य अमेरिका
कतार विश्वकपको पहिलो नकआउट चरणको खेल युरोपेली राष्ट्र नेडरल्याण्ड र संयुक्त राज्य अमेरिकाबीच खालिफा अन्तराष्ट्रिय रंगशालामा नेपाली समय अनुसार राति पौने ९ बजे सुरु हुँदैछ ।
यी दुई राष्ट्रबीच यसअघि ५ खेल भएका छन् । तर ती सबै मैत्रीपूर्ण खेल थिए । डच टोलीले ५ मध्ये ४ खेल जितेको छ भने अमेरिकाले पछिल्लो सन् २०१५ को खेल जितेको थियो ।
सन् १९९४ को विश्वकपको क्वाटरफाइनलमा ब्राजिलसंग ३–२ ले पराजित भएयता नेडरल्याण्ड १९ खेलमा गैर युरोपेली राष्ट्रसंग निर्धारित समयमा हारेको छैन ।
जसमा उसले १३ जित हात पार्दा ६ खेलमा बराबरी खेलेको छ । उसो त सन् १९९८ मा ब्राजिलसंग र सन् २०१४ मा अर्जेन्टिनासंग पेनाल्टी सुटआउटमा पराजित भएको छ ।
वर्तमान प्रशिक्षक लुईस भान गालको नेतृत्वमा १० विश्वकप खेलमा डच टोली अपराजित रहेको छ ।
नेडरल्याण्डले सन् २००६ मा अन्तिम १६ मा पोर्चुगलसंग १–० ले पराजित भएयता पछिल्लो ५ विश्वकपमा ४ पल्ट क्वाटरफाइनलसम्मको यात्रा तय गरेको छ ।
डच टोली समूह चरणका २ खेलमा जित र १ खेलमा बराबरीको नतिजा आत्मसाथ गर्दै अपराजित रहँदै समूह ‘ए’ को विजेताका रुपमा अन्तिम १६ मा प्रवेश गरेको हो ।
जारी विश्वकपमा डच टोलीका लागि कोडी गाक्पो मूख्य खेलाडीका रुपमा उदाएका छन् ।
सन् २००२ मा पोर्चुगललाई ३–२ ले पराजित गरेयता अमेरिकाले भने विश्वकपको पछिल्लो ११ खेलमा युरोपेली राष्ट्रहरुसंग जित हात पार्न सकेको छैन ।
जसमध्ये ६ खेल बराबरीमा टुंगिदा ५ खेलमा हार बेहोरेको छ । सन् २००२ मा मेक्सिकोमाथि जित हात पारे यता अमेरिकाले पछिल्लो ४ अन्तिम १६ खेलमा ३ मा पराजय बेहोरेको छ । ती सबै खेलहरु युरोपेली राष्ट्रसंगै हारेको छ ।
अमेरिका पनि जारी विश्वकपको समूह चरणमा २ खेलमा बराबरी र एक खेलमा जितको नतिजा हासिल गर्दै समूह ‘बी’ को उपविजेताका रुपमा अन्तिम चरणमा प्रवेश गरेको हो ।
अर्जेन्टिनाविरुद्व अस्ट्रेलिया
सन् २००७ मा अर्जेन्टिना र अस्ट्रेलिया मैत्रीपूर्ण खेलमा प्रतिस्पर्धा गरेयता पहिलो पटक यी दुई राष्ट्र आमनेसामने हुँदैछन् ।
उक्त खेलमा अर्जेन्टिना १–० ले विजयी रहेको थियो । विश्वकपमा भने यी राष्ट्रहरु पहिलो पल्ट आमनेसामने हुन लागेका हुन् ।
यी दुई बीच ७ पल्ट भेट हुँदा ५ पल्ट अर्जेन्टिनाले जितेको छ भने १ पल्ट अस्ट्रेलियाले जितेको छ । बाँकी एक खेल बराबरीमा टुंगिएको छ ।
विश्व फुटबलमा बलियो अर्जेन्टिनाले १८ पटक विश्वकपमा सहभागी हुँदा उपाधि २ पटक जितेको छ । त्यस्तै, पछिल्लो २०१४ को फाइनल खेलेको छ ।
पछिल्लो रसिया विश्वकपमा भने अन्तिम १६ मा साविक विजेता फ्रान्ससंग पराजित हुँदै प्रतियोगिताबाट बाहिरिएको थियो ।
जारी विश्वकपमा दुई खेलमा जित र एक खेलमा पराजित रहँदै समूह ‘सी’ को शीर्ष स्थानमा रहेर अर्जेन्टिना अन्तिम १६ प्रवेश गरेको हो । अर्जेन्टिनाका मूख्य खेलाडी ७ पटकका बेलोन डीओआर विजेता लियोनल मेसी हुन् ।
यता एसियाली राष्ट्र अस्ट्रेलियाले भने यसअघि सन् २००६ को विश्वकपमा अन्तिम १६ पुगेको थियो । जसमा इटालीसंग १–० ले पराजित भएको थियो ।
जारी कतार विश्वकपमा समूह ‘डी’ रहेको अस्ट्रेलियाले दुई खेलमा जित र एकमा हारको नतिजा बेर्होदै साविक विजेता फ्रान्ससंग गोलअन्तरका आधारमा पछि रहँदै अन्तिम १६ को स्थान पक्का गरेको हो ।
सम्भावित क्वाटरफाइनल पुग्ने राष्ट्रहरु
नेडरल्याण्ड र अर्जेन्टिना
लेखक
